Բլոգ 📚🎓

ԻՆՉՊԵՍ ԸՆՏՐԵԼ ԲԱԺՆԵՏՈՄՍԵՐ ԵՐԿԱՐԱԺԱՄԿԵՏ ՆԵՐԴՐՈՒՄՆԵՐԻ ՀԱՄԱՐ

Երկարաժամկետ ներդրում բաժնետոմսերում՝ կապիտալի աճ և դիվիդենտներ:
Երկարաժամկետ ներդրումները բաժնետոմսերում միշտ եղել են ֆինանսական կայունության ստեղծման կարևոր ուղիներից մեկը։ Ճիշտ ընտրված բաժնետոմսերը կարող են տարիների ընթացքում ապահովել ոչ միայն կապիտալի աճ, այլև լինել պասիվ եկամտի հուսալի աղբյուր՝ շահաբաժինների տեսքով։ Սակայն, ինչպե՞ս ճիշտ կողմնորոշվել շուկայում և ընտրել բաժնետոմսեր, որոնք տարիների ընթացքում կդառնան վստահելի ներդրում ձեր պորտֆելում՝ կանդրադառնանք այս բլոգում։

ԻՆՉՈ՞Ւ ԱՐԺԵ ՆԵՐԴՐՈՒՄ ԿԱՏԱՐԵԼ ԲԱԺՆԵՏՈՄՍԵՐՈՒՄ

📌 Կապիտալի կայուն աճ․ Երբ ներդրում եք կատարում ընկերությունների բաժնետոմսերում, որոնք զարգանում և աճում են տարիների ընթացքում, նրանց բաժնետոմսերի գինը նույնպես բարձրանում է։ Դա նշանակում է, որ ձեր ներդրումը ժամանակի ընթացքում կարող է ավելացնել իր արժեքը։

📌 Պասիվ եկամտի հնարավորություն դիվիդենտների տեսքով․ Բազմաթիվ խոշոր և ֆինանսապես կայուն ընկերություններ պարբերաբար վճարում են շահաբաժիններ իրենց բաժնետերերին։ Այսպես, դուք կարող եք ստանալ պասիվ եկամուտ՝ պարզապես բաժնետոմսեր ունենալով։

📌 Նվազեցված ծախսեր․ Երկարաժամկետ ներդրումները պահանջում են ավելի քիչ գործողություններ շուկայում, ինչը կրճատում է բրոքերային և այլ միջնորդավճարները, ինչպես նաև հարկային ծախսերը։

📌 Տնտեսական անորոշություններին դիմակայելու կարողություն․ Եթե բաժնետոմսերը ճիշտ եք ընտրել, դրանք կկարողանան հաղթահարել շուկայական տատանումներն ու տնտեսական դժվարությունները և ժամանակի ընթացքում ապահովել կայուն աճ։

ԻՆՉՊԵ՞Ս ԸՆՏՐԵԼ ԲԱԺՆԵՏՈՄՍԵՐ․ ՀԻՄՆԱԿԱՆ ՔԱՅԼԵՐԸ

1․ ԸՆՏՐԵՔ ՈԼՈՐՏԸ

Սկզբում կարևոր է հասկանալ, թե որ ոլորտում եք ցանկանում ներդրում կատարել։ Ավանդաբար երկարաժամկետ ներդրողների շրջանում վստահություն են վայելում ոլորտներ, որոնք մշտապես պահանջարկ ունեն՝

·Տեխնոլոգիաներ (օր.՝ Apple, Microsoft)

·Դեղագործություն (օր.՝ Eli Lilly, Johnson & Johnson)

·Սպառողական ապրանքներ (օր.՝ Procter & Gamble)

·Էներգետիկա և կոմունալ ծառայություններ

Այդպիսի ընկերությունները տարիների ընթացքում ապացուցել են իրենց ֆինանսական կայունությունն ու ճկունությունը։

2․ ՈՒՍՈՒՄՆԱՍԻՐԵՔ ԸՆԿԵՐՈՒԹՅԱՆ ՖԻՆԱՆՍԱԿԱՆ ՑՈՒՑԱՆԻՇՆԵՐԸ

Եկամուտների աճ․ Ստուգեք՝ արդյո՞ք ընկերության եկամուտներն աճում են տարիների ընթացքում։ Սովորաբար դա վկայում է շուկայի ընդլայնման և հաջող կառավարման մասին։

Շահույթի մարժա․ Բարձր մարժան ցույց է տալիս, որ ընկերությունն արդյունավետ է աշխատում և կարող է դիմակայել շուկայական ճնշումներին։

Պարտքային բեռ․ Կարևոր է տեսնել, թե որքան պարտք ունի ընկերությունը։ Ծանր պարտքային բեռը կարող է ռիսկ ներկայացնել երկարաժամկետ հեռանկարում։

Դիվիդենտային պատմություն․ Եթե ցանկանում եք պասիվ եկամուտ, ուշադրություն դարձրեք ընկերությունների վրա, որոնք տարիներ շարունակ վճարում են կայուն կամ աճող շահաբաժիններ։

3․ ՎԵՐԱԲԵՐՎԵՔ ՎԵՐԼՈՒԾՈՒԹՅԱՆԸ ՀԱՄԱԿՈՂՄԱՆԻ

Կարևոր է չսահմանափակվել միայն ֆինանսական ցուցանիշներով։ Ուսումնասիրեք․

·Ընկերության բիզնես մոդելը

·Կառավարման թիմի փորձառությունը

·Մրցակցային առավելությունները (օր.՝ տեխնոլոգիական առաջատարություն, հայտնի բրենդ, պաշարներ)

·Գլոբալ և տեղական շուկայի միտումները

4․ ԴԻՎԵՐՍԻՖԻԿԱՑՐԵՔ ՊՈՐՏՖԵԼԸ

Մի ներդրեք ամբողջ գումարը մեկ ընկերության բաժնետոմսերում։ Լավագույն տարբերակը կլինի ստեղծել դիվերսիֆիկացված պորտֆել տարբեր ոլորտներից և աշխարհագրական տարածաշրջաններից, ինչը կօգնի նվազեցնել ռիսկերը։

5․ ՈՒՇԱԴՐՈՒԹՅՈՒՆ ԴԱՐՁՐԵՔ ԳՆԻՆ

Լավ ընկերության բաժնետոմսը դեռևս լավ ներդրում չէ, եթե այն գնել եք չափազանց բարձր գնով։ Ուշադրություն դարձրեք գնահատման գործակիցներին՝ P/E (գին/շահույթ), P/B (գին/բալանսային արժեք) և համեմատեք դրանք ոլորտի միջին ցուցանիշների հետ։

Ի՞ՆՉ ՌԻՍԿԵՐ ՊԵՏՔ Է ՀԱՇՎԻ ԱՌՆԵԼ

Բաժնետոմսերում երկարաժամկետ ներդրումները նույնպես ունեն իրենց ռիսկերը․

·Տնտեսական անկումներ

·Ընկերության կառավարական սխալներ

·Շուկայի մրցակցային լարվածություն

·Գնային տատանումներ

Սակայն ճիշտ վերլուծությունն ու համբերատար մոտեցումը կարող են օգնել հաղթահարել այս ռիսկերը և տարիների ընթացքում ձևավորել լավ ներդրումային պորտֆել։

ԵԶՐԱԿԱՑՈՒԹՅՈՒՆ

Բաժնետոմսերում երկարաժամկետ ներդրումները ոչ միայն կապիտալի աճի հնարավորություն են տալիս, այլև պասիվ եկամտի կայուն աղբյուր են հանդիսանում։ Կարևոր է նախապես ուսումնասիրել ընկերությունները, հասկանալ շուկան և չշտապել որոշումների կայացման հարցում։ Մտածված ներդրումները կարող են դառնալ ձեր ֆինանսական ապագայի կայուն հիմքը։

ԻՆՉՊԵ՞Ս ԿԱՏԱՐԵԼ ՆԵՐԴՐՈՒՄ

Բացե՛ք անվճար բրոքերային հաշիվ Unibank Invest-ի միջոցով և սկսեք իրականացնել ներդրումներ։ Unibank Invest հավելվածը թույլ է տալիս մուտք գործել աշխարհի խոշորագույն բորսաներ և ձեռք բերել միջազգային ներդրումային գործիքներ, ինչպիսիք են բաժնետոմսերը, պարտատոմսերը և ETF-երը։
Բրոքերային հաշիվ բացելու համար լրացրեք առցանց հայտը կամ զանգահարեք +374 43 004 382 հեռախոսահամարով։