Բլոգ 📚🎓

ՆԵՐԴՐՈՒՄՆԵՐ ՊԱՐՏԱՏՈՄՍԵՐՈՒՄ․ ԻՆՉՊԵՍ ՍԿՍԵԼ և ՎԱՍՏԱԿԵԼ 2025-ԻՆ

ՆԵՐԴՐՈՒՄՆԵՐ ՊԱՐՏԱՏՈՄՍԵՐՈՒՄ 2025
2025 թվականը լի է նոր հնարավորություններով ներդրողների համար։ Ֆինանսական շուկաներում միտումները ցույց են տալիս, որ պարտատոմսերը շարունակում են մնալ ներդրումների առավել կայուն և կանխատեսելի գործիքներից մեկը՝ հատկապես շուկայի անորոշության պայմաններում։ Այս բլոգում կպատմենք՝ ինչ են պարտատոմսերը, ինչու արժե ուշադրություն դարձնել դրանց 2025-ին և ինչպես կարող եք սկսել ներդրումներ կատարել այս ակտիվում՝ ձևավորելով եկամտի կայուն աղբյուր։

Ի՞ՆՉ է ՊԱՐՏԱՏՈՄՍԸ

Պարտատոմսը արժեթուղթ է, որը հաստատում է ներդրողի (գնորդի) և թողարկողի (օրինակ՝ պետության, բանկի կամ ընկերության) միջև պարտավորությունը։ Երբ դուք գնում եք պարտատոմս, դուք փաստացի տալի եք վարկ թողարկողին, իսկ նա պարտավորվում է պարբերաբար վճարել ձեզ տոկոսներ (կուպոնային եկամուտ) և պարտատոմսի վերջնաժամկետին վերադարձնել հիմնական գումարը։

Պարտատոմսերը կարող են լինել․

·Պետական․ թողարկված կառավարության կամ կենտրոնական բանկի կողմից,

·Կորպորատիվ․ թողարկված խոշոր կամ միջին ընկերությունների կողմից,

·Մունիցիպալ․ թողարկված քաղաքային կառույցների կամ տեղական ինքնակառավարման մարմինների կողմից։

2025-ին պետական պարտատոմսերը հատկապես ակտուալ են Հայաստանում և միջազգային շուկաներում՝ համեմատաբար ցածր ռիսկի և կանխատեսելի եկամտի շնորհիվ։

ԻՆՉՈ՞Ւ ԸՆՏՐԵԼ ՊԱՐՏԱՏՈՄՍԵՐԸ 2025-ԻՆ

📌 Կայուն եկամուտ․ Տոկոսների վճարումը նախապես սահմանված է պայմանագրով, և այն չի կախված շուկայի կտրուկ տատանումներից։

📌 Համեմատաբար ցածր ռիսկ․ Պետական պարտատոմսերը համարվում են ամենանվազ ռիսկային ներդրումային գործիքներից մեկը։ Կորպորատիվ պարտատոմսերը մի փոքր բարձր ռիսկ ունեն, սակայն ճիշտ վերլուծության դեպքում նույնպես կարող են լինել լավ ընտրություն։

📌 Դիվերսիֆիկացիա․ Եթե ձեր պորտֆելում կան միայն բաժնետոմսեր կամ բարձր ռիսկով ակտիվներ, պարտատոմսերը կօգնեն հավասարակշռել ընդհանուր ռիսկերը։

📌 Արտարժութային եկամուտ․ Որոշ պարտատոմսեր թողարկվում են դոլարով կամ եվրոյով, ինչը կարող է լրացուցիչ պաշտպանություն ապահովել արժութային տատանումներից։

ԻՆՉՊԵ՞Ս ՍԿՍԵԼ ՆԵՐԴՐՈՒՄՆԵՐ ՊԱՐՏԱՏՈՄՍԵՐՈՒՄ

Եթե դուք առաջին ներդրումն եք անում պարտատոմսերում, ահա ինչից արժե սկսել․
1․ ՍԱՀՄԱՆԵՔ ՁԵՐ ՆՊԱՏԱԿՆԵՐԸ
Ի՞նչ եք ցանկանում՝ պասիվ եկամուտ, կապիտալի պահպանություն, թե արժույթի դիվերսիֆիկացիա։ Օրինակ, եթե ձեզ անհրաժեշտ է կանխատեսելի եկամուտ, պետական պարտատոմսերը լավ տարբերակ են։

2․ ՈՒՍՈՒՄՆԱՍԻՐԵՔ ՇՈՒԿԱՆ

Հետազոտեք՝ ինչ թողարկումներ կան տվյալ պահին։ Հայաստանում պետությունը պարբերաբար թողարկում է պարտատոմսեր դրամով և դոլարով։ Կարող եք նաև դիտարկել միջազգային առաջարկները, եթե ունեք մուտք արտասահմանյան շուկաներ։

3․ ԸՆՏՐԵՔ ՀԱՐԹԱԿ

Ներդրումներ կարող եք կատարել բանկերի, բրոքերային ընկերությունների կամ հարթակների միջոցով և ընտրել լավագույնը ձեզ համար։

4․ ՈւՇԱԴՐՈՒԹՅՈՒՆ ԴԱՐՁՐԵՔ՝
  • Տոկոսադրույքին (կուպոն)
  • Վերջնաժամկետին
  • Չվճարման ռիսկերին
  • Արժույթին

Օրինակ՝ 2025-ին Հայաստանի պետական պարտատոմսերի միջին տարեկան եկամտաբերությունը դրամով կազմում է շուրջ 9-10%, իսկ դոլարով՝ մոտ 5-6%։

5․ ՏԱՐԲԵՐԱԿԵՔ ՌԻՍԿԵՐԸ

Մի ներդրեք ամբողջ գումարը միայն մեկ պարտատոմսում կամ մեկ թողարկչի մոտ։ Տարբեր տեսակների պարտատոմսերի միքսը կօգնի նվազեցնել հնարավոր ռիսկերը։

ԵԶՐԱԿԱՑՈՒԹՅՈՒՆ

Ներդրումները պարտատոմսերում 2025-ին կարող են լինել ձեր ներդրումային պորտֆելի հուսալի հիմքը։ Կարևոր է սկսել փոքր քայլերից, վերլուծել առաջարկները և հետևել շուկայի զարգացումներին։ Հիշեք՝ պարտատոմսերը չեն խոստանում հսկայական եկամուտներ ինչպես բարձր ռիսկային ակտիվները, բայց կարող են ապահովել կանխատեսելի, պասիվ և կայուն եկամուտ՝ հատկապես երկարաժամկետ հեռանկարում։

ԻՆՉՊԵ՞Ս ԿԱՏԱՐԵԼ ՆԵՐԴՐՈՒՄ

Բացե՛ք անվճար բրոքերային հաշիվ Unibank Invest-ի միջոցով և սկսեք իրականացնել ներդրումներ։ Unibank Invest հավելվածը թույլ է տալիս մուտք գործել աշխարհի խոշորագույն բորսաներ և ձեռք բերել միջազգային ներդրումային գործիքներ, ինչպիսիք են բաժնետոմսերը, պարտատոմսերը և ETF-երը։
Բրոքերային հաշիվ բացելու համար լրացրեք առցանց հայտը կամ զանգահարեք +374 43 004 382 հեռախոսահամարով։